الصفحات

الثلاثاء، 31 مايو 2011

Bye Bye April and May


Write it on your heart that every day is the best day in the year
[  Ralph Waldo Emerson   ]
....
- الصديقة العزيزة "قطرات الندى" .. الله يعافيج ان شاء الله وتردين بالسلامة .. لج وحشة أد الدنيا .. :)

- كل الاأحداث اللي في هالبوست بتكون صارت في الفترة الأخيرة تقريباً آخر شهرين فاللي بقدر أذكره بكتب عنه ..


- قدمت ورقة نقل على أساس انتقل من القسم اللي أنا فيه إلى قسم ثاني، وصلت الورقة عند رئيس القسم ورفضها!!!!!!!!!!!!!!!! .. ليش ؟؟ يقول مافي بديل.. من الأساس ما يحتاج بديل لأنه عنده 5 محاسبات ... رحت اليوم الثاني عند نائب المدير وبعدها رحت معاه عند المدير .. ورقة النقل ماره عليه وعلى علم بالموضوع وكلمته وطلبت اني انتقل والقسم مش محتاج بديل .. وعدني خير بس أنا ما عندي ثقة بوعودهم ..

- بعد أيام اتصلت فيني اختي على أساس إني أقدم إجاز بتاريخ 26-6 موعد السفر، كتبت ورقة الإجازة وبعثتها مع المراسل لرئيس القسم .. ورفض يوقع عليها...!!!!!!!!!!!!!! بعثتها مرة ثانية ورفض... فجاة لقيته على باب مكتب يقولي " توه الناس على الاجازات" ، رديت عليه أني بكون مخلصه كل شغلي وكل الرواتب نازله ف البنوك، رد علي إنه بنرتب الموضوع .. أنا ما عندي مشكلة إنه يرد علي بهالرد لو متعود مع الكل، لكن الكل يقدم اجازة ومحد يعترض ليش أنا كله معترض معاي ..

- نفس اليوم رجعت البيت وأختي طول الطريق تتكلم في التلفون، وصلت البيت جلست اتغدى وهي تتكلم، اشرت عليها تسكر الخط لأني أريد أكلمها، وكنت آكل وانا ومتنرفزة، وفجأه أحس بعظم في بلعومي...آآآآآآآآآه احساس بالالم ما تتخيلونه ... شربت ماي وما نفع، كنت بس اكل وما ادري شو اكل وبالي مشغول باللي صاير .. المهم حاولت اهون موضوع العظم :) بس مش قادرة ورحت النادي وانا مضايجة منه، ورجعت ورحت المركز الثقافي  بحضر دورة مع صديقتي وانا مش مرتاحة، حتى مش قادرة اضحك كلما اضحك احس بالم في البلعوم، وفـ نص الدورة رحت المستشفى قسم الطوارى وكان يوم غريب عجيب ..

- دخلت على الدكتور قلت له القصة وانا اضحك، قالي بسيطة مخدر بسيط على منطقة الفم وبحط لج آله ممكن شوي تسبب لج الم بس لو حسيتي بالم خبريني .. ألم وتقولي بسيطة .. والله ماادري كنت اضحك والا خايفة .. بس اللي صار كله اول مرة يصير لي .. ما نفعت طلب مني اشعة لانها بتكون اوضح اذا في عظم والا .. "من نولدت اكل سمك وماصار لي هالشي" ، خلصنا الاشعة ورجعت للدكتور شاف الاشعة وقالي انها مافيها اي شي بس الاحتمال انه يكون الالم بسبب جرح سببه العظم ...:) كتبلي مضاد وكم دواء .. الحين المفروض اروح البيت، بس لا رحت معرض الكتاب مع صديقتي، و بعدها حضرنا محاضرة "ل نجيب الشامسي عن الازمة الاقتصداية" وبعدها رحن شوربنا شوربة سي فود لاني كنت محتاجة شي ساخن، والساعة 10 رجعت البيت بعد يوم حافل .. :)
صورة الاشعة وبلعومي الجريح .. :)

- سجلت لحضور منتدى الاعلام العربي 2011 في دورته العاشرة في دبي .. يومي 17-18 مايو الحالي في فندق جراند حياة .. من الساعة 8 ونصف صباحا الى الخامسة مساءاً ولمدة يومين ..
جانب من الحضور اثناء الاستراحات ..

- زميلة معي في العمل .. اتصلت فيني وانا في المكتب ..
هي : منال تعالي مكتبي شوي ..
رحت لها المكتب وبالمرة ما كانت على بعضها ..
هي : من تتوقعين كانت عندي قبل شوي في المكتب ..
أنا : ماادري .. قولي ..
هي: زوجة فلان .. !!!!!!!!!!!!!!
فلان هو موظف معانا في العمل، كنت الاحظ كثرت الاتصالات بينهم، وكانت تتحدث عنه دائما امامي دون ان تنتبه الى انه من حديثها ممكن أنتبه الى مشاعرها ..
كنت الاحظ ارتباكها اخر الدوام في الممرات عند مروره المتعمد .. والاحظ نظراته اليه في تلك اللحظات ..
المهم: جاءت زوجته واللي عمري ما اتخيل انه الموضوع ممكن يكبر لهدرجة .. اكبر اكبر مما احد يتخيله ..
صديقتي نفسيتها كانت في الحضيض لانه زوجة الموظف هددتها تزورها في البيت وتتكلم عند اهلها بكل اللي صاير .. المهم بما اني الوحيدة اللي اعرف صارت تتصل طووول اليوم فيني ادور حل، حتى اذان الفجر يأذن وهي تتصل فيني ولازم كنت ارد عليها على الاقل اكون معاها حتى لو ما لقيت لها حل .. تفاصيل جدا جدا مرهقة نفسيا فوق قدرتي على احتمال الوضع مع اني خارج الموضوع بس في اسبوعين ونص ضعفت 3 كيلو .. ما اتوقعت بالمرة اني اتاثرت لهدرجة ..
بعد شهرين من المشاكل والمكالمات والتعب النفسي وبعد وبعد وبعد كل هذا .. رجعت الموظفة مع الموظف وكأن ماصار أي شيء ..  ورجعت علاقتهم .. ودي أكتب عن هالموضوع لاني محتاجة اطلعه مني بس متكاسله شوي .. :)
...
..
- زميلة عمل: منال حلمت فيج امس انج مقدمة استقالتج وكاتبة السبب للتفرغ للعبادة .. :)

- اعود من النادي لأفاجأ بصديقتى على باب غرفتي، بدات حديثها منال صار لي يومين أحلم فيج وخفت عليج، فيج شي ... :)


- ترسل لي صديقتي رسالة  فيها بان صديقة مشتركة حلمت فيني ..
*"حميد القطامي" هو وزير التربية والتعليم في دولة الامارات" ..:)
..
- فلبينية البيت جتني يوم الجمعة لتحبرني بأنها حلمت بي بالامس كان الحلم الأجمل من بين كل الاحلام .. .. :):)

- اتابع مسلسل " مطلوب رجال" بصراحة المسلسل عجيب غريب، مجرد علاقات لكني اتابعه، مرات احب اتابع المسلسلات اللي الكل يذمها ليش ماادري .. :) المسلسل ينعرض يوميا على قناة Mbc4 الساعة 9 مساءا ..
...
- العادة ما اروح حفلات الزواج، يعني نادر نادر ما اروح، وعلشان خاطر متدربة تدربت معنا في القسم حبيت اجاملها واحضر عرسها، وقلت لـ صديقتي رباب تحضر معاي .. :) المهم حضرنا وحسيت اني في حفلة عيد ميلاد مش عرس من كثر الاطفال اللي كانوا على الكوشه .. :) المهم طلعنا من بعدها ورحنا نشرب شاي النعناع اللي تعودنا عليه واللي "بيطير العقل" ولسكان الامارات - ترى الشاي موجود في محطات بترول الامارات بس .. المهم وصلنا محطة البترول، لكن كيف مستحيل وحده منا تنزل خصوصا انه عبايتنا ما تناسب الا الاعراس والساعة كانت 11ونص .. :):):) فنادينا العامل الهندي اللي يعبي بترول وقلنا له ونحن نضحك انه نحن ما نقدر ننزل بس اذا ممكن يطلب لنا شاي بالنعناع .. كل هذا علشان بس نشرب شاي النعناع مع بعض ... اللي ما جربه ترى فاته نص عمره ..  وبخصوص الشاي رحنا كل سوبر ماركت وكل هايبر ماركت ما حصلنا وبالصدفة حصلته ف كارفور بس الاكيد لما يكون مع شخص عزيز بيكون طعمه غييييييييير .. رباب  الشاي الاخضر معك غير وف البيت غير .. وصار مشروبنا اليومي كل ما طلعنا ..

- عيد ميلاد شيخه بنت اختي :) وف الصورة شيخة مع بعض الهدايا اللي وصلتها ..:)

- حمد مبروك على الماجستير وعقبال الدكتوراه إن شاء الله ..
...
- Sms, bbm, e.mail
..

...
زميل عمل اراه في السنة مرتين تقريبا او ثلاث، هو في قسم بعيد عن قسمي، بيننا سلام فقط إن التقينا وهذا نادر جدا، جاءني اتصال منه يسال عن اجراء خاص به، وقبل انتهاء المكالمة سالني عن اجراء اخر يخصه، جاوبته بانه سيكون في الشهر القادم، طلب هاتفي لمتابعة موضوعه غدا للضرورة، فأتفاجا بهذا المسج منه مساءا.. "ماادري شقول عن هذا المسج ابصراحة .." حتى الاعجاب له ادب ..على الاقل اذا ما احترمتني احترم المكان اللي نحن فيه ..
..
..
- اليوم تدخل علي معي في القسم موظفة تطلب مني ورقة الاجازة، ولما سالتها ليش قالت انه رئيس القسم طالبنها حتى يوقعها .. سالتها ليش ما طلبها مني، ردت عليه انه قال اني من بعد المواقف معاه يقول اني صرت رسمية وجديه معاه .. يعني كيف كنت قبل .. ما اتوقع كنت غير .. المهم وقعها .. وباقي توقيع ورقة النقل .. :)
- وصلتني إيميلات بخصوص مدونة اليوميات .. من يوم الخميس راح تكون مفتوحة بس توقفت عن الكتابة فيها من شهر تقريبا .. حاولت أكمل بس ما قدرت ..

هناك 8 تعليقات:

Tekana يقول...

الله يعينج علي تسلط الرؤساء فعلا شي مزعج. يمكن لانج ناويه تنتقلين منهم يبون يضايقونج. وسالفة العظم او شوكة السمج هههه سلامات ياما صارت فيني احسن علاج لها تاكلين تمره او قطعة خبز :)
وسالفة الاعجاب او العلاقه بين الزملاء بالعمل لا تعليق صراحه. والادهى انه متزوج ! عاد الحين متابعه مسلسل بنات آدم. ويتكلم عن هالموضوع
والاحلام ان شالله تكون بشاره خير دام السالفه فيها وزراء :)
همممم شنو بعد. اي زميلج بالعمل هذا صج صج قليل ذوق وسمِّج
وضحكتيني علي تشبيهج العرس بعيد الميلاد فعلا الاطفال بالعروس يسوون فوضي ويصير العرس مو مرتب. شوقتيني علي جاااي النعناع احبه وايد ان شالله اذا ييت الامارات اجربه
واخر شي كل عام وشيوخه بألف خير يااارب

Manal E. AlNuaimi يقول...

Tekana
يا مساء الانوار .. والله عفيا عليج قديرتي تقرين كل اللي كاتبته، مع انه بعض الجمل احس تحتاج اني اصيغها مرة ثانية بس كنت اكتب بسرعة وخايفة لا انسى شي ..

وعلى طاري شوكة السمج ، ما خليت تمره ما اكلتها بس يمكن كنت احس بالالم لانه في جرح وانا على بالي الشوكة بعدها واقفة ابلعومي .. :)

ما تابعت المسلسل بس لحقت قبل كم يوم على اخر 10 دقايق منه .. :) باحاول اشوف وقته واتابعه ..

ضحكتيني على سالفة الوزراء .. :):)

يعني لو اوصف لج العرس م ليوم ل باجر ما بخلص .. حسيت انا اكبر وحده من كثر اليهال الل حوالي .. والمصيبة اني كنت جريبة من الكوشه يعني بارتي الميلاد صوبي .. :)

شاي النعناع اكيد موجود عندكم بالكويت بس هذي صورته جريبه وخبريني رايج فيه.. يعني بوصفه لج لما تحطين الماي الحار تشمين ريحة النعناع تدخل داخل داخل راسج ..:) اشرايج عاد بالوصف .. :)


هذا موقع الشركة ..
http://www.teekanne.com/our-products/

وهذا اللي اقصده Teekanne Peppermint
وهذي صورته
http://www.sayadmarket.com/product_images/u/188/Teekanne_Peppermint_Tea.jpg__28523_zoom.jpg

وشيخه تسلم عليج .. :):) وتقولج انتي بالف خير ..

mese يقول...

صباح الخير :) الغاليه

الله يسلمج ويعافيج ويسلم لج كل غالي يارب.

بصراحة حتى أنا داخ راسي من هالشهرين إلي ذكرتيهن :| الله يكون بعونج..بس آخر شيء الحمد الله أنه وافق على الإجازة.

وسلامت بلعومج, الحمد الله إنه الموضوع محتاج ادوية مش أدوات.

وآخر مسج ما أدري شقول عنه بس هذا كان شكله ملان وحب يتسلى @@

أحلى شيء صورة شيخة..كل عام وهي بخير الله يخفظها يارب..

الشاي الأخضر تقصدين البارد أو السخن؟
كلهن أحبهن, بس أذكر أنج كنتي مدمنه الشاي المغربي ماادري اظن.

وسلامي لج:)

غير معرف يقول...

اوووووووه الجو عندك كان جدا حافل ومرهق ..

يالله بتجي الإجازه وبترمين كل هذا الهم وبتريحين راسك وترتاحين .. اكيد بيكون لها طعم بعد هالشيءء ..


وبالمناسبه اذا بلعتي عظم خذي ملعقة زيت زيتون ترى يمشي الوضع زين وينهي المسأله لو صار فيه عظم ناشب ..

وحمدلله على سلامتك وإجازه ممتعه عزيزتي ..(:

غير معرف يقول...

ma etshofeeen shar yal '3aliaaa ;***
i luuuve yew,ur posts always make me smile or laugh ...

and abt the guy msg,loooooolz i agree with him, ur a loveable person ya3ne ten7abain <3..i wish i had a friend like yew,, u seem like a very loveable gurl <3


and plzzz post much more often ><"

Adistic_Girl

sab7al5air يقول...

نورتي مدونتك طولتي الغيبه يا منال

Eslam Samir يقول...

ايامك سعيدة منال:)

خليل السيد يقول...

حياة يومية جميلة