الصفحات

الخميس، 27 مايو، 2010

Bye Bye May ..!!!


Believe that life is worth living and your belief will help create the fact.
[    William James  ]


أستمع إلى : طلال مداح - انا راجع اشوفك
أشرب : Florida Orange Pineapple Juice
آكل : -
المزاج : أفكر ..

- ما عندي شيء اكتبه، بس بحاول أكتب أي شيء ..

- بدأت في التجهيزات للسفر، وستكون الوجهة أسبوع في باريس، وأسبوع في جنيف، والسفر في بداية شهر 7 ..

- قريبا إن شاء الله راح تكون عندي مدونة ثانية، بيكون فيها كل إلي ما أقدر اكتبه في هذا المكان .. وبتكون secret .

 - قدمت الاربعاء اللي فات اجازة، وكنت في ممر القسم فـ ناديت على المراسل لأني أريد ورقة تقديم الإجازة.
ثواني وإلا تلفون المكتب يرن..
ص:  مقدمة إجازة، ما من شر، فيج شيء ..؟
أنا : لا مافيني شيء، بس بروح دبي .. 
ص: هاتيلنا من هواها ..
أنا : haha إن شاء الله ..
ص: عادي أسألج سؤال ..؟
أنا: إسال
ص: ليش أحياناً أشوفج مبتسمة، وأحايناً معصبة، لا لا لا مش معصبة، يعني كأنج مضايجة من شيء أو تفكرين في شيء وشاغل بالج ..؟
أنا: ماأدري يمكن شيء صاير..
ص: إذا في شيء ترى لا تفكرين فيه وايد، أنا أمس كنت مضايج من شيء واليوم نسيته بالمرة، جذيه أريح ..
الموضوع طااال وايد، وكان عن نفسيات الناس، ومزاجيتهم في التعامل ..

رئيس القسم متصل، وما أدري كيف وصل الموضوع بيننا للـ "السمك"
رئيس القسم: إنتي تاكلين سمج ..؟
أنا: أنا آكل كل شيء من البحر.. :)
رئيس القسم: كل شيء ..؟؟
أنا: كل شيء حتى الطحالب شرات باباي .. :)
رئيس القسم : hahaha يالذكية باباي كان ياكل سبانخ مش طحالب ..
أنا :hahaha اشدراني اتلخبطت .

- رحت دبي لمدة 3 أيام، اشسالفة ه 3 أيام ماأدري ..

- وأنا في نص الطريج رايحة دبي ذكرت إني ناسية الموبايل والبلاك بيري في البيت.. ما اتخيلت هالشيء يصير، والمصيبة إني قلت ما بأخذ اللاب توب يكفيني البلاك بيري ..
 3 أيام تقدرون تعيشونها بدون موبايل ولا انترنت..؟؟!!  أنا الصراحة ما اتخيلت الوضع أول شيء، بس يومي كان يضيع كله في المول، وأرجع المساء تعبانه، وأنام ..
اللي صدق يضحك، إنه ماكان في الشقة منبه أو ساعة وكنت احتاجلها علشان أعرف الوقت وأقوم للصلاة.. وساعتي اللي لابستها تتحرك بالدم  يعني لو مالبستها بتوقف، فـ علشان ما توقف عني صرت أنام وأنا لابستها .. :) ..

- صديقتي اتصلت فيني
هي: عطيني لينك المدونة، ضاع مني وأريد اقراها ..
شوي وإلا تبدأ تعليقاتها على كل شيء، لين وصلت لموضوع "أنا ودبي وحذا لوبوتان"، فوصلني مسج منها "جنني هالشوز الحين الحين اتصورينه لي .."
والتعليق اللي ضحكني منها في رسالة "منول تدرين إني أنسى البوست واقرأ المقطع في "لك فقط"، من تقصدين..؟ ، ولمنو هذا كله ..؟" ..
مني لج يا بنت .. "هذي يا حبي يسمونها لقاااافة ما بخبرج عنها" ..

- اثنين من أطفال العايلة عدنا .. وبدت الأسئلة ..
هم : تعرفين المطربة اللي تشبهج ..؟
أنا :لا منو هذي ..؟
هم: ما نعرف اسمها بس نحن مسمينها منول لأنها تشبهج ونفس الصوت بعد ..
انا: من وين هي ..؟
هم: يمكن مصرية، بس والله تشبهج وايد .. نحن نعرف اسمها بس ناسينه .. حاولي تقولين أسماء يمكن نذكرها..؟
أنا: الحين لازم أعطيهم أسماء مطريات جميلات لأني لازم بكون أشبه وحده جميلة ..:)  امممم بديت بأنغام ..
هم: لا لا هذي ما نعرفها .. اللي نقصدها مرة كانت في برنامج ستار صغار .. عطينا اسم ثاني ..
أنا: شو أغنيتها.. انزين .. لحظة بفكر .. ماأدري ليش استعيلت وقلت "شيرين عبدالوهاب" ..وإلا أشوف اثنين جدامي يناقزون ويقولون هيييييييييييييييييييييي هذي اللي نقصدها ..
أنا:  نعععععععععععععععم .. أنا أشبهها .. صدق ما عندكم نظر .. :)
يعني أنا أحب شيرين بس عاد ما أشبهها، هذيلا ما أدري كيف مشبهينها عليّ ..

- كتاب Eat, Pray, Love  للكاتبة  Elizabeth Gilbert's  تم تحويلة إلى فيلم سينمائي بطلته Julia Roberts الكتاب كنت قد قرأته منذ حوالي العام، لم يكن ممتعاً فقط، كان أكثر أكثر أكثر من رائع .. وبانتظاره في دور السينما في اغسطس 2010 .
...
- في هذا الشهر:
* أول مرة أحط lipstik أحمر ..
* أول مرة أروح دبي بدون كاميرا ..

ممكن تساعدوني ..
- أريد عناوين روايات عربية مرت عليكم وقريتوها ومن الحجم الكبير ويفضل إنها تكون اصدرات حديثة.
- كيف أخلي المدونة محد يقدر يتصفحها إلا إذا كنت ضايفة ايميله عندي.. ؟ دورت عن الطريقة وماعرفت .. 

** لك فقط: متصوّر و أنا غلطان . و أردد قدرت أنساك . أتاريني و أنا حيران . بأدور على لقياك . [أنا راجع أشوفك - طلال مداح - كلمات  محمد العبد الله الفيصل ] ..

هناك 28 تعليقًا:

sab7al5air يقول...

حلوه ياشرين الحكوه ودايما اسعد بمروري من شرفتك.انا كمان مثل رفيقتك يستوقفني تذيل البوست ومافيه من خصوصيه
ع الهامش
ارتاح لالوان واستايل مدونتك

beautiful mind يقول...

دايما وانتي بتكتبي اي بوست جديد
انا بعيش بكلماتك كاني موجود بالفعل
اتمنالك ان شاء الله اجازة سعيده
لكنك عودتينا علي طول الغياب
يارب يكون المانع خير
وان شاء الله يدوم التواصل
تحياتي

Manal E. AlNuaimi يقول...

صباح الخير ..
انتي الأحلى دائماً ..
اذاً فانتي تشبهين صديقتي في التوقف عند "لك فقط" ..

منورة بهذه الزيارة .. وسعيدة بأن ستايل المدونة يروق لك ِ ..

ومساج خير ..

=====

beautiful mind ابتعدت قليلا عن التدوين وعن التعليق في المدونات .. وانا هنا معكم الان ..

واجازة سعيدة لك ايضا ..:)

Tekana يقول...

اجازة سعيدة ان شالله

احب اقرا مدونتج بليز لا تسكرينها او ضيفيني ان يور لست :)

سلة ميوّة يقول...

حبيبتي منال...


احب آخر الشهر بسبتج...

امس نزل معاشي...وابتسمت ..قلت اكيد بتنزل منال البوست..

اقولج شي...

احداث وايد هالشهر..بس مادري ليش قريتها

وحسيت بنبرتي وانا اقراها بتعب...

بحزن..وبثقل.....



المهم...


اي جربت ااسافر 14 يوم من غير موبايل...من غير تلفون..من غير شي...


وتبين الصج...واي واي وناااااااااااااااااااااااااااااااااااسة....

اتعرفين شنو شعور روعه انج معزوله عن العالم؟؟؟
كنا في لندن ومانشستر 14 يوم!!
كنا انا واختي وبنات خالتي
انتواعد على طريقة قبل....

وانا نوعي عصبيه شوي...ماحب انطر..
واختي مثلي...
فبنات خالتي حياتي كانو مايبونه انعصب فتلقين بالوقت بالظبط انتلاقي


وماعندنا اي مشاكل مضبطين اوقاتنا على اوقات الاندر جراوند

وكان عندنا حركة اتضحك
الي يطوفها القطار انغني لها
لندنس بيرننج على طريقة ام خماس :)

( نفس الحلقة الي غنت بالاندرجراوند بلندن هاهاهاي )

اممم ادري استرسلت..ذكريات حلوه وايد كانت...


ابي اغيرلج جو;********

*Being One يقول...

احلى شي بالشهر لما رحتي اجازه لوول احب الاجازات اخخ متى نخلص من الامتحانات P:
بس ترى حلوه التجربه لما تنقطعين عن العالم بس ادري منتي عايدتها مره ثانيه

سوالفج تونس منال ^^

قوس قزح يقول...

أتمنى لك اجازة سعيدة ..

" يومياتك جميلة ..

. أنصحك بقراءة الجسد حقيبة سفر لغادة السمان .. أو سقف الكفاية ل حسن علوان ..
...

بالنسبة لحصر رؤية مدونتك لأشخاص محددين و يا رب أكون واحد منهم ...ممممممممم
بأقول لك بمصطلحات أنجلش ..

اذهبى الى : setting
ثم الى آخر خيار permission
أذهبى الى : Readers
ثم إختارى : only people i choice
.. يا رب ما تنسينى ..
ممممممم
...
دمتى فى بهجة

mese يقول...

صبآح الخير..

ودعتي هالشهر,وشكلج خلآص شارده من الحر ؛) .. تروحين وتردين بالسلآمه وإجازة سعيدة إن شاء الله..

أكثر شيء متعب تجهيز الشنط :( إلا إذا كنت راغبة من القلب بالسفرة :)تكون الشغله ممتعة حتى شنط غيري أرتبها لهم بسرعة ..

أفتكيتي تبين الصدق من الموبايل وإخوانة الكبار => خذتي إجازة حقيقية بدونهم..
بس بدون كاميرا هذا إلي مش حلو :/

لالالا هذي ما حبيتها كيف سر!! مدونة لج وتكون سر!!! أعيدي التفكير :)

سوالفج مع ص ومدير القسم غريبة! مساكين شكلهم ملانين وإنتي من النوع المستمع :)

شوقتيني للكتاب :) بس المشكلة إنه إلي عندي ما خلصت منهن بس بينحط بالقائمة..

إنزين ما قلتي لنا نوع الروايات إلي تحبينهن؟ بس أحس أننا ما نتشابهه وايد في إختيار الكتب,إلا بعشق أحلام :)

اااممم كيف تخلينها خاصة..
من ( إعدادات > السماحات > الأشخاص الذين أختارهم فقط) بعدين أظن لازم ترسلين لهم دعوة أو بالإشتراك وأنتي توافقين على من تريدين منهم.

إن شاء الله قدرت أساعدتج :)

أسمتعت بالتجول معك منول..
أنار الله حياتك بالإيمان وأسعدك برضا الوالدين ..
ولكِ مني كل الود والإحترآم..~

إسلام محمد يقول...

/

منوووول
هذا الصباح جميل جداً ، مروري هُنا بين المسافة التي سرقت منكِ أشياءك و أعطتكِ دبي ، يشعرني بشي من هذا الجمال :)

نداء مصالحه يقول...

صباحك سكر منووووله

ضحكني بوستج عند " شيرين " ترى انا ما شفتج بس أأكدلج انج أحلى منها ههههههه
ما عليج من خراابيط الصغار :P

وبعدين يا عمي مين قدج بتروحين باريس وجنيف والله انا حلمي اروح باريس :'(
اخس عليج منووله مااا تعزمين صديقتج تروح ويااج :( ترى انا زععلت وايد الا ااذا بتراضيتني بشوكولاطه فرنسيه :P

اخر شي شكرا على رسالتج انا بخير وسلامه الحمدلله وبس اطلع من هني ببعثلج مسج علىى ميلج اشرحلج شنو السالفه ههههه

فتج بعافيه يالغااليه ;)

Manal E. AlNuaimi يقول...

Tekana علشانج عاد ان هونت عن فكرة إني أسكر المدونة .. بخليها مفتوحة للكل بدون استثناء .. ولو صار في يوم من الايام راح تكونين من أول الناس المضافين .. :)

وان شاء الله اجازتج تكون سعيدة بعد ..

=======

سلتي الجميلة

هالمرة صار العكس .. نزل راتبج قبل البوست .. :)

تدرين عاد أول مرة أوصل لنهاية الشهر وأنا ما عندي شيء اكتبه .. يمكن صارت اشياء اكثر من المكتوبة بس اغلبها سلبي وخصوصا في الشغل، ففضلت إني ما اكتبها ..

انتي وصفتي الحالة وكأنج معاي
تعب.. حزن.. ثقل..

سلة كيف 14 يوم ......؟؟؟ صعبة وما اقدر ..بس لما قلتي وناسة حسيت اني أريد اسويها .. :)

مواقفكم بدون موبايل تونس ..
وتشجع الواحد يسويها ويبتعد عن الموبايل .. بس سالفتكم باغنية لندنس بييرننج ضحكتني ..

لما رحت دبي كل شوي افتح شنطتي على اساس اقول يمكن احد اتصل فيني .. واضحك لما اتذكر اني امشي بدون موبايل ..

ما طولتي بالعكس ونستيني بسوالفج ..

=========

*Being One
ومنو ما يحب الاجازات ..
انتي بس ذاكري الحين وبالتوفيج ..

هي تجربة حلوة وجربتها بدون تفكير مسبق ..بس من رجعت البيت على طووول الغرفة اعوض عن ال 3 ايام ..

Being One ماادري بعيدها والا بس سلة قالت لي وناسه،.. فيمكن اجربها بالصيف لما اسافر .. اذا سويتها راح اخبركم باللي صار ..

======

قوس قزح رواية سقف الكفاية لم استطع الى الان ومنذمدة طويلة ان اكمل قراتها باستثناء بعض صفحاتها بالرغم من ثناء الاغلب عليها ..
سأحاول قراءتها .

اغلب كتب غادة السمان لدي، واعيد قراءتها كلما رغبت في الاستمتاع بالقراءة..
هذه المراة استثناية بالنسبة لدي ..
جميل قلمها.. ومثقف ..

شكرا على شرح الطريقة .. امممم ماادري بفكر اذا راح اضيفك او لا .. :):)ما اعتقد اني راح انفذها .. بس لو صار "ابشر" ..

======

mese مساج خير عزيزتي ..
لا بعدني مطولة في الحر لين شهر 7..

الله يسلمج ..

حبيت جملة الموبايل واخوانه لكبار.. ضحكت عليها ..:pPp
بدون كاميرا .. ماادري يمكن لانه نحن نروح نفس المكان، فأغلب هالمنطقة مصورتها.. فقلت هالمرة بشوف الاشياء بعيني واستمتع بها بدون ماافكر بالتقاط صور لها ..

الملل وما يسوي ، ونحن هالشهر خلصنا الشغل على غير العادة من وقت، فالكل صاير فاضي ..

الكتاب لا تفوتين قرايته اذا انتي تحبين هالنوع من الكتب .. كتبي في
google عنوان الكتاب وشوفي شو مكتوب عنه، على الاقل اذا ما عجبج تكونين على تعرفتي عليه ..:)

انا شو أحب من الروايات ..؟
خل اقولج من اللي قريته، بس مستوياتهم متفاوته ..
البؤساء - مذكرت فتاة الجيشا هذي من اورع ما قريت - روايات نجيب محفوظ تقريبا كلها- بنات الرياض- صمت الفراشات .. ماادري واااااايد .. الحين شكلي بروح اقعد جريب من مكتبتي وبكتب لج العناوين .. يمكن اسويها مرة اذا فضيت وبحط عناوين الكتب اللي عندي فوق في about me

شكرا على الطريقة ..
اول مرة انتبه لكلمة السماحات .. :)

وشكرا الف مرة على الدعوة اللي نهيتي فيها ردج .. وبانتظار قراءاتج ..

=======

مساؤك أجمل إسلام ..

دائما مرورك لا يشبهه شيء ..
دبي تعوضني عن الاشيياء المفقودة .. فكل ما بها جميل .. :)

Manal E. AlNuaimi يقول...

نداء مساج خير ..

hahahahha عجبتني كلمة خرابيط الصغار ..دام قلتي انا احلى يعني انا احلى ... :)

انتي تامرين امر ..
وراح راضيج باللي تطلبينه ..
امري انتي بس .. :)

انا لاحظت غيابج .. ورحت شفت الردود عند سلة وبعد ما لقيتج من بينهم ، فبعثت لج برسالة .. :) اكيد انبسطتي لما شفتيها .. :):):)

قريت الايميل .. والف الف مبروك .. والله يحقق لج دايما اللي تتمنينه ..

بس تعالي نداء .. الحين سلة اتعب عمرها كل يوم وتعلمج خليجي .. وترجمه ودنيا، واخر شي تكتبين لي "فتج بعافية" ... hahahhaha هالكلمة يقولونها اخوانا المصريين نحن في الخليج ما نقولها .. بس بسامحج هالمرة وبنعديها علشان الموضوع اللي في الايميل ..:):):)

Reem يقول...

أحب أحاديث آخر الشهر ..
بس هالمره أول ما قريت عنوان البوست تحبطت و صار فيني " لأ may لا تروح ؛( " .. إلا إذا شقحنا على طول و رحنا شهر 8 .. لول !

أسافر كل صيف لمدة 3 شهور بدون موبايلي أو لابتوبي العزيز .. تتخيلين :) ؟ .. بس حلو الشعور .. و الأحلى اللهفة وقت الرجعة ، و صوت الموبايل اللي ما يهدا من أفتحه أول ما أرد الديرة .. نحتاج أحياناً لبريك من كل شي .. حتى الأشياء اللي ما نخيل حياتنا تمشي بدونها ..

ما أحب أشوفج متكدرة ترى ؛*
و أحسج هالفترة " منت رايق " ، عساج بخير .. و لا تتضايقين من شي ، عند الله فرج إن شاء الله :)

لي صار ما صار ..
عزمينا ها ؛)

حنيــــــن يقول...

اجاااازة سعيدة وسمر احلى مدونة حلوة واحلى شيء اللون الابيـض

Manal E. AlNuaimi يقول...

Reem
3 أشهر بدون موبايل وانترنت .. وانا 3 ايام وكنت اشوفها وايد .. احيانا يكون أريح، بس مرات وفي السفر احس اني بحتاجله خصوصا في الطلعات ، الا في حالة انج خذتي بطاقة تلفون خاصة بالبلد اللي انتي فيها .. هنيه بيكون المتصلين فيج محدودين خلال هالفترة .. بس تراح انتي وسلة حمستوني اني اسويها .. :) :) ..

كنت "منت راايق ..:) " بس فترة وعدت ..

لي صار ما صار ترى البشارة لج .. :):) ...

وصباحج خير ..

=======

حنيــــــن
شيء مني وجدته في مدونتك .. ربما نتشابه في البياض الذي يغطي المدونة ..حاولت ان اغير ألوان المدونة ولكني لم ارتح للفكرة .. فالابيض اراه الاجمل ..

ميمة السبيت يقول...

** صباح الورد رحتي دبي اكيد كليتي نفيش بالكاراميل عجييييييب

و احلى شي بالسفر انج تسكرين الموبيل و إلا شالفرق

خَيَال يقول...

إجازة سعيدة مقدماً
باريس
كتدرائية نوتردام مقابل لها على الجهة الثانية من النهر شارع جميل فيه كتب قديمة وحديثة بكل لغات العالم
اذا معاكم أطفال راح يشفون شي عجيب في حدائق الكتدرائية ممتع جداً
قصر فرساي - اللوفر - ساحة الليدي فانس
أماكن تستحق الزيارة
جنيف ممتعه اخذي سويس بس ودوري كل سويسرى ...
بالنسبة لإخفاء المدونة ماعتقد شي زين ضروري تكون له نقطة تلاقي مع المتابعين

قريبا إن شاء الله راح تكون عندي مدونة ثانية، بيكون فيها كل إلي ما أقدر اكتبه في هذا المكان .. وبتكون secret .
أعتقد فيج من الشجاعة الكثيره تقدرين تقولين كل اللي تبينه ..
دمتي بخير يا أختي العزيزة

Manal E. AlNuaimi يقول...

ميمة السبيت

انا من الامارات بس ماعرفت "نفيش بالكاراميل" ..

شكلكم كلكم من اللي تسكرون موبايلاتكم بالسفر .. على بالي انا لما نسيته بالبيت 3 ايام شي يديد ، اثاري الناس تتركه بالاسابيع والاشهر .. :)

=========

خَيَال ..

ودي اطلع رحلة في نهر السين وتكون المساء، يعني بعد الغروب .. :):)

كل اللي كتبته رحت بحث عنه، وان شاء الله نزورهم كلهم ..
الدولتين زايرتنهم من قبل بس من سنوات ..

سيدي، اردت فقط ان اعرف طريقة الاخفاء ولكن لا توجد نية الان في جعلها مخفية عن القراء .. فالمدونة لازالت في بداياتها ..

اما بالنسبة للمدونة الاخرى، فهي ليست جديدة وقد فكرت بها عدة مرات، وفكرت ايضا في التشتت الذي قد يصيبني بين المدونتين .. انا لم ابدأ بها للآن ، وانتوا بعد ما شحعتوني .. :)

وصلتني بعض الايميلات والتعليقات هنا بعدم تأييدهم للفكرتين [فكرة الاخفاء وفكرة المدونة لاخرى] .. لذلك قد لا تكون هناك مدون اخرى، وان كانت لن تكون secret ..:)

شكرا خيال على كل المعلومات .. :)

7osen يقول...

ليش مدونة ثانية بأمكانج تقولين كل شي هنيه

الرويات كثيرة جداً

أقري ترمي بشرر عبده خال
أو شيكاغو علاءالاسواني
وغيرها الكثير
مجرد ماتروحين مكتبة راح تحصلين كل إللي تدورينه

تحياتي لكِ

mese يقول...

الله يجعل البسمة بحياتج دووم :)

راح أراسلج قريب عشان سالفة الكتب >> أريد استفيد منج أصلاً =>
.. ..

وأتمنى تقبلين مني التاج :)
http://al-ndaa.blogspot.com/2010/05/blog-post_9144.html

.. ..
ودي وإحترآمي..~

انه انا لكنها ليست انتي يقول...

الصيف والسفر ذكروني بقصيدة رائعة للشاعر : عبيد موسى حارب يقول فيها

سافر لا تودعني... أخاف تشوفك عيوني.

وأخاف اشواقي تجرحني...إذا سافرت من دوني.

أيا ليت السفر ما كان...وحتى لوعة الحرمان.

وبصبر كيف انا الولهان...عن اللي هم يحبوني.

من اللي بعدكم شاري...من اللي يرحم يداري.

من اللي يفهم افكاري...إذا انتوا تركتوني.

أحبك دايم بقربي...تعيش العمر في جنبي.

ولا لك في السفر طاري...ولا تبعد عن عيوني.
***********

اما فسالفة الطحالب بصراحة هلكت عليها من الضحك ... بس انتي يمكن تكونين زيتونة زوجة باباي وبندور لج على بلوتو الدب المعجب
***********
سالفة اغلاق المدونه اتمنى انها ما تكون امتداد لقراراتج العجيبة في الهروب من المواجهة وحل المشكلات .

تقبلي تحياتي

انه انا ولكنها ليست انتي يقول...

رواية الراحلة للدكتور بشير الرشيدي رائعة وتستحق القراءة

Manal E. AlNuaimi يقول...

7osen

صارلي فترة منقطعة عن زيارة المكتبة يمكن لان عندي مجموعة كبيرة للحين ما نتهيت من قرايتها .. بس في موقع دار الساقي شفت مجموعة كبيرة من الروايات ..

سأستبعد عبده خال :) لاافكر بقراءة اي من كتبه بعد فسوق ..

شيكاغو قراتها من اكثر من سنة تقريبا .. راااائعة رااائعة ..

وشكرا على عناوين هالكتب ..

========

mese

شو احلى من هالدعوة قبل ردج .. وايامج ان شاء الله ..

اذا حاب ترسلين لي العناوين على الايميل فايميلي موجود في جهة اليمين
واي استفسار بخصوص الكتب انا حاضرة ..

دخلي دار الساقي شفتها احسن عن نيل وفرات من بعد ما غيروا موقعهم وانا ما ارتاح فيه ..

اما بخصوص التاج فراح اجاوب عليه ان شاء الله .. :) وصلني مرتين .. :)

=========

انه انا ولكنها ليست انتي

الطحالب والسبانخ سالفتهم صدق ضحكتني حزتها ..

انا مش زيتونه .. :(

قرار اغلاق المدونة راح يكون امتداد لقراراتي العقلانية ..:)

رواية الراحلة اول مرة اسمع عنها وعن مؤلفتها بس سويت عنها search وقرت ملخصات عنها ..

q8-lawyer يقول...

هلا منال عندج واجب وياليت تحلينه؛)

http://crazygirl-q8.blogspot.com/

سلة ميوّة يقول...

hello dearest

there is a home work in my blog to do

please chick my blog :)))


have anice day

الشاعر الفنان أحمد فتحى فؤاد يقول...

صباح الخير منال
شا اخبارج ... شو علومج .. شو مسوية

أتمنى بخير

يبالج سفرة تريحين فيها راسج

هاهاهاهاها

كوكتيل البوست ده رائع ...

يا رب تتمتعى بالأجازة فى أى مكان فرنسا .. سويسرا ... إن شاء الله حتى الهند ... المهم خذى أقصى حد من المتعة

حلو الأحمر

تروحى الأجازة و ترجعى بألف سلامة

soso يقول...

قمت بشرح مبسط لكِ حول كيفية جعل المدونة للأشخاص الذي تريدهم فقط :

http://dc213.4shared.com/download/306766759/3872694f/___online.jpg?tsid=20100604-131239-3b078650&forceAttachmentDownload=true
"قومي بتحميل الصورة من الرابط أعلاه"
ولو مافي استفسار خبريني

Manal E. AlNuaimi يقول...

q8-lawyer + سلة ميوة الواجب ان شاء الله بحلة جريب مع اني مش فاهمة السؤال الاول ..
هلا منال عندج واجب وياليت تحلينه؛)


==========

احمد فتحي اشوفك ضباط اللهجة المحلية عدل ..

على فكرة انا رايحة الهند 6 مرات وما بتتخيلش يا احمد انا بنبسط فيها ازاي .. دي الهند الوحدها عيزا اكتب فيها بوستات مش بوست .. :)

الله يسلمك .. وانت اجازتك امتى .. وحتروح فين ..؟

=======

soso
ماادري كيف اقولج شكرا ..على تعبج هذا

بنزل الحين الصورة ..

ومرة ثانية مشكورة حبيبتي ..