الصفحات

الأحد، 27 يونيو 2010

Bye Bye June



“I hurt myself today to see if I still feel, I focus on the pain the only thing that's real
Nine Inch Nails


استمع الى :  عني تغيب اشلون علمني اشلون .. باقي العمر واشلون يحلى بلياك .. [ الرويشد - تغيب اشلون]
آكل :  Cadbury Flake
أشرب : Water


- وصلت الدوام وأنا مصدعة .. اتصلت ب كافتيريا العمل ..
أنا : صباح الخير غسان، ممكن واحد تركش بدون سكر .
غسان : أخت منال أخت منال ممكن سانية من فضللك ..
رجعت براسي ع الكرسي وأقول ف خاطري مش ناااااااقصة ..
أنا: تفضل غسان .
غسان : أخت منال إنتي بتعرفي ليش الجامعة العربية اجتمعوا قبل فترة..؟
أنا: hhhhhhh في خاطري أضحك .. بس ساكته ..
غسان: اجتمعوا ت يناقشوا مشكلتي ..
..................................................................................................................
........................................................................................
....................................................
أنا: معقولة ..
غسان : ...............................................................................................................
.........................................................
..............................................................................................................
 ...............................................................................................................
أنا : لا ان شاء الله ما بيصير الا كل خير ..
غساان : ..........................................................................................
................................................................
...............................................................................................................
لصداع متعبني وغسان يتكلم وانا واصله حدي بس شسوي ..
غسان: ما توخزيني اخت منال طولت عليكي ودوشتك بمشكلتي ...
أنا : لا أفا عليك ..
متصلة علشان أخفف صداعي بكوفي، بس صدعت زيادة ..

 - للأسف ما تابعت افتتاح كاس العالم لأني ما كنت  بالبيت، وما فكرت أشوفه للحين لأني قريت إنه كان عادي ، بس سألت عن أهم شخص بالنسبة لي مانديلا "أحب هالانسان"، وقالوا لي إنه حفيدة بنته اتوفت .. تعازينا يا مانديلا ..

 - هالشهر كان الشغل فيه متواصل، من السابعة إلا ربع صباحاً وأنا في المكتب وحتى الثانية والربع، ونكمل اللي بقى في بعض الأحيان العصر .. وأعتقد إنهم أطول 3 أسابيع مرن عليّ بحياتي .. ومن أكثر الأسابيع إرهاقاً ..


- إني أشبه شيرين عبدالوهاب موضوع وعدى، لكن في الدوام مصرين إني أشبه داليا البحيري، جد جد ما عندكم ذوق، ووحدة من صديقتي في الدوام من أول ما بديت الدوام لليوم وهي تقول إني أشبه لمياء طارق "اللي يقولون إنه أصلها مصري".. ما أدري فيني جينات مصرية وأنا ما أدري وإلا شسالفة .. ومن أيام كنت ف دبي فسألتني خليجية إنتي من الدوحة قلتلها لا فقالت لي شكلج من الدوحة .. :)
مريت على كل الجنسيات ..

- وصلني TAG من أربع صديقات ..  mese - سلة ميوة - ALroooRq8-lawyer

- اذكر اسم من طلب منك حل هذا الواجب.  [جاوبته فوق] ..
- تحدث عن ستة أشياء تخصك ..؟ "غيرت في السؤال شوي" .. 
* محد يعرف أنه عندي مدونة من الأهل غير بنت أختي و ولد أختي ..
* أحب الأناناس، والذرة والكستنه " chestnut " ، والكبة النية، وما أحب الكيوي والفراولة.. ومن أنا وصغيرة ما كلت مانغو للحين ..
* أحب الشتاء أكثر من الصيف، أحب اللون الأبيض والأسود،  وأحب آكل الأكل بعد ما يبرد ..
*عندي فوبيا الوزن الزايد، يعني بعد كل وجبة لازم أصعد على الميزان وأشوف وزني ومع إني ضعيفة إلا إني دايماً أشوف نفسي العكس.
* أعاني من الصداع النصفي ..
 
- من سنتين وأنا أدوّر كتاب عن فرح ديبا.. لقيت كتب في معارض الكتاب بس باللغة الفارسية، وبالصدفة من أسبوع كنت في مكتبة Borders ولقيت كتاب عنها، ما طرت من الفرحة  إلا وصلت السماء، الكتاب عنوانه [فرح بهلوي - مذكرات] اصدار 2010.. وفي الكتاب مجموعة كبيرة من الصور..
..
كتب المذكرات تشدني، وأجمل ماقرأت منها :
* رحلتي الطويلة من أجل الحرية - مذكرات نيلسون ما نديلا.
* مذكرات وريثة العروش - للأميرة بديعة ابنة علي حفيدة ملك العرب الشريف حسين بن علي
* مذكرات أميرة عربية - الأميرة سالمة ابنة السيد سعيد بن سلطان -- سلطان عمان وزنجبار (1804 ـ 1856) .
* الدبلوماسية واجهة ومواجهة - لـ عصمت الملحوق زوجة السفير السعودي في عدة دول .. 
-  البوست اللي بعد هذا بيكون يعنوان  BYE BYE UAE .

..
..

لك فقط : العمر باهت لا طعم له ولا لون ، ياللي خذيت أحلى ليالي وياك ..[الرويشد - تغيب اشلون]

هناك 9 تعليقات:

سلة ميوّة يقول...

ولهت عليج كبر السما والأرض


ولهت عليج وايد وايد

انتي وينجّ!!!!!


لج وحشه :**



والله قمت انطر نهاية الشهر على شان البوست :(


البوست اليوم بارد..

اشوفج تكتبينه وانتي متسنده على ايدج اليمنى وطاقه جبدج...


ونص ابتسامه على ويهج..

ترجعين تشتطين...واطخين...


منو الي مزعلج ياحبيبتي بس قوليلي...



منو مضايقج هاتيه اسويه حتت:)



انزين...على الأسرار...

لاتاكلين كبه نية لو سمحتي..اتسوي وايد امراض ترى :(



اممم وحست انج اتحبين الأناناس ..انا هم صايره احبه واحبج:*


:)


امممم


عن الوزن



الي فيج شي اسمه
destructive image


يعني اتشوفين نفسج غير عن الواقع...

هذا يبيله ايميل خاص:) ادردش لج فيه :)



المهم


لاتغيبين عنه...


ولا تضايقين ترى كل الي يشبهونج حلوين ويطقهم الملح


لاتحاتين:**


لوف يو سووو


:*

Manal E. AlNuaimi يقول...

انتي مش بس لج وحشه .. انتي لج وحشتين وثلاث وعشر .. :)

انا ويني والا انتي .. ؟؟ اختفيتي .. وشغلتينا ببوست "خبرية" ..U_U ان شاء الله فترة وعدت ..:)

والله يا سلة مثل ما قلتي بالضبط .. اكتب وامسح .. وبعدين اقول بكتب شيء ثاني وارجع امسحه ..
وصدقج متممدة ع السرير واطقطق مرة اكتب وعشر امسح ..

جد جد كان هالشهر الشغل مرهق .. ومتعب .. واحس طاقتي خلصت .. واحس انه مافيني حيل افكر اشبكتب ..

ابصراحة كانت مواقف وايد بكتبها ، واشياء وايد سويتها بس والله ماادري ليش ما كتبتها .. بعوضج بالشهر الياي ويا الراتب ..:):):) ..

يلا بانتظار نصايحج ع الايميل .. وراح نبطل ناكل كبه .. :)

مزعليني وايد .. ممكن اطرش لج اياهم للكويت تسوينهن حتت ..:) hahhahahha عيبتني الجملة .. :)


البوست الياي الاخير وبعده انقطاع مؤقت وبرجع ببوستات راح تكون كلها خاصة لج .. :) ..


LOVCH WAAAAAAAYED

rainbow يقول...

دايم الواحد قبل الاجازة
بتتراكم عليه الاعمال ..
انشاء الله لما تروحين اجازة تنسى كل هالتعب ..
وأهم شي فى الاجازة إن ما فيها غسان
هههههههههههههههه
... انا انصحك تاخذين معك براد كوفى صغير و تحطيه عند مكتبك ..
..
من 6 سنوات أنا كنت فى جوهانسبرج
وكانوا مسويين مكان مثل مجمع فنون و مولات وكافيهات .. وفيه قبه سماويه
جميله مسويينها و مطلقين عليها اسم نيسلسون مادنيدلا .. وكان كل يوم يجى يجلس فى هالمكان و يسلم على الناس
ولما رحت للأسف ما جا يومها ..
..
سلامتك من الصداع النصفى ..

حالِمه .., يقول...

مطولة البوست بالنقاط ..........
يعني تخدعينا :q

بوست لطيف وكلمات"تغيب شلون" عوار :(

mese يقول...

يا هلا ومرحبا بمطول الغيبة.
.. ..

وااااضح واااضح إنج ملآنه وتعبانه ومتضايقة :(
بس يله باين أنه ماشي باقي عن إجازتك وبتسافرين تغيرين جو >> مع أننا بنشتاق لج بس عشان راحتج كل شيء يهون, ولا تنسين رمضان خلاص قرب, وقربت راحه النفس معاه :)
.. ..

شو رايج تخلين شغلج وتفتحين عيادة نفسيه صدق أحسن لج =>
يمكن كان لازم تكونين دكتورة نفيسه وتنافسين د. أحمد النجار ؛)
.. ..

ااممممم يمكن غيرانين منج أصحاب التشبيهات, يمكن تصدقين>>> انتي حطي لنا صورتج ونحن بنقولج تشبهين من :> هههههههه
.. ..
أحيانًا نحب نخلي بعض الأمور خاصه.

ليييش ما تحبين المنجا عاد ألحين موسمه يم يمي حلو, أكيد صار لج موقف عشان جيه ما تاكلينها.

حبج للذرة والكستنه يؤكد حبج للشتاء؛) جلسات السهر على الضو والشوي.

الله يشفيج ياوخيتي, وماتشوفين شر إن شاء الله.

دووم تغايريني بكتبج :) حبيتهن كلهن.

ونحن بإنتظارة عزيزتي, وتروحين وتردين بالسلامه.

ودي وإحترآمي.

may يقول...

أول شي سلامات وما تشوفين شر.. طمنينا عليج ..

بالنسبة لأسرار التاج استمتعت فيها..

وأحلى شي الكتب اللي في نهاية البوست ، جزيل الشكر لهذه الترشيحات الرائعة..

:)

بالتوفيق ،،

Manal E. AlNuaimi يقول...

مرحبا قوس قزح

ما بنسى التعب بس بالاجازة .. بنسى الدنيا وودي بعد ما ارجع .. :)

استمتعت جدا بقراءة ايميلك الخاص بالناس من حولنا والتعامل معهم ، وطباعهم واخلاقهم، نعم لا يختلفون فهم موجودين في كل مكان ، ونحن مجبورين للتعامل معهم، وضبط انفسنا في التعامل معهم .. وكتبت فعلا كل مااردت ان اقوله ..
فنحن نضطر للتعامل مع اناس يختلفون عنا في الثقافة والتفكير، وهذه الفئة يصعب علي التعامل معها .. فافضل الصمت والردود القصيرة في الحديث معهم ..

بوستات السفر ستكون هنا بعد العودة ..
والله يسلمك .. :)

=========

حالِمه
ليش الفضايح :) .. حبيت اسويلكم بوست النقط .. شيء يديد ..

النقط حبيبتي كنت اقصد فيها الكلام اللي كان يقوله غسان وما حبيت اكتبه .. فحطيت نقط ، وطولها اقصد فيه انه اتكلم واااااااااااايد ..

رويشد كلماته دايما على الجرح .. احب اغنية قدييييييييييييمة واااايد اسمها "أي معزة" وااااايد احبها ..

كلماتها ..
اي معزة .. وانت خليت فيها شيء ..:(

وبعد اغنية قديمة اسمها "نقطة التغيير" هالاغنيتين وايد احبهم ..

==========

mese

بعد انتي تقولين اني ملانه .. :) احاسيسي صارت تنتقل لكم عن طريق البوستات .. :)

ماادري ليش السنة اللي فاتت يت على بالي فكرة، اني ليش لما رحت الجامعة ما درست علم نفس، ماادري شو السبب هالفكرة في هذيج الفترة، يمكن كنت ادخل منتديات تخص الاشياء النفسية وحبيت مواضيعها .. ماادري والله ..

للامانة انا مااعرف احل المشاكل انا بس استمع، وصرنا بالنادر ما نحصل حد يسمعنا لو حبينا نتكلم عن شيء يخصنا او شيء صارلنا.. في الغالب الي يحب يسمع يكون طبع الفضول هو الغالب مش رغبة في التخفيف عن الطرف الثاني ..

ومتى ما وجدت الثقة يتحول التخوف في الحديث الى االاسترسال براحة اكثر ..

الحين عاد تبين تشوفين صورتي ومب عارفة قلتي غيرانين .. :) انا احس اني اشبه شيريهان .. :) شو الراي ..؟ امزح طبعا ..


المانغو من فترة حاولت اني اكله بس ما قدرت .. بس اذا حابه تضحكين ضحكي انا اشرب عصير المانغو بس ما اكله .. انا روحي اضحك على عمري ...

الشر ما ايييج حبيبتي ..
الله يسلمج وعلى فكرة حطيت مجموعة الكتب لج علشان تتعرفين على الكتب اللي كنت اقصدهن .. ونسيت كتاب من بينهن عن حياة غاندي .. روعة .. ونفس الكتاب في منه dvd ..

بخصوص كتب غادة السمان الالكترونية ان شاء الله بيوصلنج بالايميل .. تراني صايرة وايد انسى .. :)


=======

عزيزتي مـي

الشر ما اييج ان شاء الله ..

يلا بانتظار تاج ثاني وثالث .. اتاخرت شوي في الاجابة لكني استمتعت ..

هذي بعض الكتب اللي تخص السير الذاتية قريتها وعجبتني .. وكنت قارية من مدة كتاب هيلاري كلينتون .. وكتاب بيل كلينتون .. بعض اجزاء هذه الكتب حشو وبعضه يستحق القراءة ..

ومساج خير ..

غير معرف يقول...

سلامتك من الصداع ..

وعاد غسان شكله حاس ان فيك صداع قال بلمره اكمل الناقص ...

ياااااااااااه من جد زحمة العمل تسبب إكتئاب مو صداع ...

وعلى طاري شكلك ترى عادي ..انا ماخلو جنسيه الا وحطوها فيني بس اكثر شيء قالوا انتي من الامارات ..

نصيحه حطي اعلام الدول على وجهك ..بلمره احتفال بلمونديال وجواب لكل الاسئله عشان شكلك ...(:

انتظر دايم أمانيك هنا واقراها ..
استمتع بها كثيراً ..
دمتي بحب لا ينقطع ...(:

غير معرف يقول...

هلا منال يعطيج العافيه

بالنسبه للتشبيه شيرين وداليا ولمياء مافيهم وجه شبه فأعتقد إنه إلي يشبهج مايعرف يشبه بين الناس

وأكيد إنتي أحلى منهم :)

وأخيرا حليتي الواجب

انا نفسج أحب الشتا أكثر من الصيف

وعكسج أموت على المانجا وخصوصا المصريه والهنديه يمي يمي