الصفحات

الأحد، 25 أبريل 2010

Bye Bye April




April's rare capricious loveliness
[  Julia Dor ]
::
::
أستمع الى : OOOh AFRICA
آكل : Cookies
أشرب : نسكافيه
:
::
- كنت أمشي بسرعة في البيت ورايحة غرفتي .. الصراحة كنت أركض وعلى بالي الباب مفتوح دزيته وإلا الباب مسكر وأنا لابسه نظارتي فضربت الباب بويهي وانكسرت النظارة والله سلم لي عيوني الجميلة .. :) ..
::
- حضرت كورس تعريفي في وزارة المالية في أبوظبي بخصوص الموزانة الصفرية [أشهالأسامي هالغريبة] ، الدورة ما كانت تخصني بس أنا رحت معاهم .. الاسبوع الأول المحاضر اتكلم عن موضوع عن الموازنة الصفرية اللي راح تعتمدها الدولة والمصطلحات اللي راح يتم استخدامها  وتوضيح كل مصطلح، الأسبوع اللي بعده بعد رحنا واتغير المحاضر، واتكلم عن تعريف المصطلحات وكان بعيد بشكل نهائي عن اللي قاله المحاضر في الأسبوع الأول.. هذا وهم يشتغلون مع بعض .. [فوضى] ..

- تلفون المكتب يرن طلع [ص] تذكرونه .. :)
ص : منال ممكن اتجربين اذا البرنامج يشتغل وإلا بعده عطلان ..
أنا : لا للحين ما اشتغل ..
ص : محتاج له ضروري .. ما تقدرين تسوين شيء ..
أنا : يوم بصير وزبرة المالية بدبر لك إياها ..
ص : hahah إن شاء الله، بس إذا صرتي لا تنسينا ..
أنا: بعطيك رئاسة القسم ..
ص : هااااااااااا .. لا ما أرضى يزيد الشغل ويزيد التعب والراتب نفسه ما بيتغير ..
أنا: اضحك عليه ..
ص : إنتي ما تعرفين المثل اللي يقول .. [يوم بتعشق اعشق قمر، ويوم بتسرق اسرق جمل] ..
بالذمة هذي الحين أمثال تنقال . .

- حضرت دورة بعنوان " نحو شخصية قرارية مؤثرة " نفذتها منى الزايد من دولة البحرين .. الدورة كانت يوم السبت الصبح، والسبت إجازة، والمحاضرة مدتها طويلة .. ومليت ف نصها بس تميت للآخر، والمحاضرة بعد حصرت أمثلة الدورة كلها في مجال ضيق في حدود عايلتها ..[ كانت 100% ملل ..]

- منو قدي .. الفلبينية عدنا في البيت تصبّح علي بـ " Good Morning Miss Beautiful "، ومثلها إذا شافتني المساء ..

- متدربة عدنا فـ الشغل ضافتني في BlackBerry، المهم يابتلي العصبي من كثر البرودكاست اللي اطرشه من تصبح، رحت وحذفتها، فبعثت  رسالة لموظفة معانا تعرفها، قالتلها، قولي لمنال شكراً لأنها حذفتني، رديت عليها بأنه هالشيء بالخطأ "كذب طبعا" فـرجعت وضافتني مرة ثانية وأنا مستحملة البرودكاست .. شسوي بهالناس ... ليش هالازعاج ..
ولأن أغلب الموظفات يستخدمن BlackBerry  .. وحده من الموظفات عملت لموظفات القسم والقسم اللي جنبنا Group ..فصار مكان للسوالف الجماعية ..

- وصلتني رسالة SMS مضمونها .. "كنت أقرالج وابتسم بس هالمرة لما قريت لج فرت دمعة من عيني " كان هذا المسج على البوست اللي حمل عنوان "رسائلي اليه 2 " ..

- تابعت 3 أفلام اشتريتها من فترة ..
* WE ARE MARSHAL
* Something's Gotta Give
* Breakfast At TIFFAN'S

- انتهيت من قراءة كتاب واحد فقط في هذا الشهر، وكان كتاب " تجربة بنك الفقراء "، ومؤسس هذا المصرف  محمد يونس، وقد فاز  بجائزة نوبل للسلام لعام 2006 مناصفة مع المصرف بسبب جهودهما في خلق فرص للتنمية الاقتصادية والاجتماعية..
وتعتمد فكرة البنك على تقديم قروض صغيرة لتمويل مشروعات منزلية تقوم عليها غالبا نساء. وقد قدم البنك منذ تأسيسه أوائل الثمانينيات نحو 11 مليون قرض، ووصلت نسبة تسديد القروض إلى 99%.* [الجزيرة نت]..

- قضيت 3 أيام في دبي .. الشهر اللي فات كان الجو أبرد، هالمرة كان جاف .. كنا نطلع الساعة 9 ونص نروح مشي لـ دبي مول ونرجع تقريباً الساعة 12 مشي بعد .. بس الجو كان حار وجاف .. 

- دخلت علي المكتب موظفة وقالت لي إنها حلمت فيني أمس إني رايحة معاهم العمرة ..تفسير العمرة على حسب كلام Google يقول إنها نهاية العمر .. [اللهم ارزقنا حسن الخاتمة ].. ومن فترة وصلتني مجموعة كبيرة من الهدايا وأغلبها بدون مناسبة، وأغلب الهدايا مالي حاجة فيها فوزعتها كلها، وكنت قاعدة مع الوالدة أقولها وزعت اللي عندي كله مثل اللي يوزع تركته قبل ما يموت .. :)  إذا اختفيت أكثر عن شهر بيكون الموضوع فيه شيء .. "والحمدلله على كل شيء" ..

- هالموقف نسيت اكتبه .. :) رحنا وزارة المالية في دبي أنا وموظفتين والمفروض بعد موظفة تكون معانا بس ماراحت، فاتصلت فينا تلفون ونحن في الطريج فما ردينا عليها .. اتصلت على الأولى ما ردت .. وعلى الثانية ما ردت عليها.. عمداً طبعاً .. فقالت للي معاها في المكتب اتصلي فيهم إنتي أنا اتصل محد يرد .. شوفيهم لايكون سووا حادث في الطريج .. :) .. أضحك وألا ابكي ..
::
- حضرت دورة بعنون "ابهار الآخرين"، نفذها الشيخ الدكتور عبدالعزيز النعيمي، يعني لو أتكلم عن الدورة أيام ما بتكفيني .. كل المواقف التي ذكرها كأمثلة عن تجربته الشخصية في أبهار الآخرين اجتمع فيها "مجرد رأي شخصي" أخلاق عالية جداً + ذكاء وسرعة بديهة عالية جداً في هذا الرجل .. وستكون له دورة أخرى االشهر القادم أيضاً .. 

- أول ما وصلت البيت من بعد يوم طويل ومتعب في الدوام، يرن الموبايل ..
أنا : هلا "دلال"
دلال : منول إنتي اشفيج على "م" تشتكي تقول منال متغيرة، ومنال لما أكلمها حتى ما اطالعني، "هذي الكلمة عجبتني الصراحة"، وووو ..
أنا: صبري شوي شوي مش ملحقة .. أنا مافيني شيء عليها، لو فيني شيء كيف أصلاً بكلمها، وإنتي شفتيني اليوم وأنا أكلمها عادي ..
دلال : المهم ماأدري .. بس إنتي اتصلي فيها، أو حتى لو مسج، تقول "منال متغيرة علي وما أعرف ش السبب"..
انا: ياربي قتلج مافيني شي ..
اليوم الثاني ..
- كلمتها عادي لأنه أصلاً مافيني شيء..
اليوم الثالث الصبح دخلت مكتبهم ..
- أنا أطالعها وأقولها إزيك ..[وأنا واقفه أمام مكتبها] ..
رفعت رأسها وطالعت اللي جنبي وقالتلها الحمدلله ..
انا ضحكت .. اللهم لا تبلينا .. يعني أنا اكلمج اطالعين اللي جنبي كييييييييييف ..اللي بيزعل يزعل .. أنا مش فاضية ..

- انتهى برنامج شاعر المليون، وودعت سهرات الأربعاء .. :) الحين صايره ادمان على قناة FOX SERIES ..

هالشهر أنا صايرة مثل هذي اللي بالصورة
 بومة بومة بوووووومة .. :)


لك فقط : صاحبي باموت من كثر الحنين [ بدر بن عبدالمحسن ]
::

هناك 12 تعليقًا:

غير معرف يقول...

منووووووووووووول بسم الله عليج شهالفال ال مش حلووو

الله يطول بعمرج =)

وبعدين ع سالفة دبي تراج معزومه المره اليايه اتسيرين ويانا :) الممشى أحلى من دبي مووول...

وع طاري Fox Series دوريلي مواسم ER بأسرع وقت ممكن

انا شغالتنا اتقولي "Good morning princess"

هممممم شو بعد ؟؟؟ هيييييييييييه لا تنسين تكتبين عني فالبلوق مره ثانية ولا مره شفتج كاتبه عني "جان أعصب"

سلة ميوّة يقول...

انا شغالتني ماتنادي اسمي حتى!!! اتخاففففف
والله العظيم انا طيوووبه وحدي معاهم كوووووول ومازف لما يغلطون ليش محد يقولي جووود مورنينيج ..حتى لو جود مورنينج مااااوس:P


المهم

السلام عليكم
ومساج الله بالخير
ااااخ منج يامنووول
قمت انطر اخر الشهر حق المعاش :) وحق تقريرج هذا
واهم شي
اني اقرا المود مالج واروح اقلده
يعني الحين انا اسمع افركا واشرب نسكافيه واكل كوكيييييييز
هيهيهيههيهيهيهيهيهيهيهيهي
منال...لاتموتين:(


انا احبج ومابي يصير فيج شي :( الله يخليج تمّي معاي زين:*****


الله يحفظج لشبابج و يجمعنا واياج بالجنة يارب

امممم
وبعد...
اي لفت انتباهي شي مهم

اي في وايد بنات يتزعلوووون
عالفاضي والمليان اتحسين ناس متسببين ياشيخ...فكونا بتزعلون زعلو ماله داعي الافلام الهندية

المهم..وعلى ص....
:)

صراحه...هالولد يبيلي اكتب فيه بوست
دزيلي سالفته ايميل وحياتج:P


المهم
شهر نيسان وما ادراك مانيسان


ياربي هالشهر حلو..على مرارته

(مو لاني انولدت فيه :P )


اممم انا هالشهر قريت رواية لأمين معلوف
المشكلة عندي فوبيا حشرات! والقصة اتخليني اتحكك من سوالف الحشرات ا لي فيها

المهم
...



مساج الله بالخير

Manal E. AlNuaimi يقول...

موزة داخلة تكتبين تعليق والا تطلبين طلبات .. :PpP بفكر في الـ JBR بس بعد هناك جو ثاني ..:)

ُمسلسل ER مالقيته للحين ..

وانتي بعد يدلعونج .. شو هالعايلة الدلع ..:):) ..

بفكر اكتب عنج .. عن شو تبيني اكتب بالضبط ..

=====

سلة قريت ردج وانا في الدوام .. وزين انه بروحي لاني فطست ضحك على جود مووورننج ماوس ..
قوليلها ادلعج من اليوم وساير ..

ياريت يزعلن وبس ..
اول شي يزعلون بدون سبب .. وبعد يسون افلام هندية .. ولازم الكل يعرف انهن زعلانات ومنو سبب زعلهن
فاضيلكم ترانا ..

تاريخ كم ميلادج .. ما يبتي طاري من قبل .. والشهر خلص ..

اذا لقيت موضوع الولد يستاهل بتلاقين ايميل مني وفيه التفاصيل .. :) يوميات ص بتكون .. :)

نداء مصالحه يقول...

صبااااااحها فل وورد جوري :P

منووله انا بكلمج كويتي .. تاريني عامله حمله هالشهر ابي اتلعم اللهجه منك ومن سلّة ميوّه ( زين ما سوّيت )
أمي بالبيت معوره روسنا بالمسلسلات الكويتيه .. الحين صرت اعرف اتكلم زيكن تقريبا ههههه
....

شوفي بقلج شي بسالفة الحلم .. آخر مره تهقين جوجل وتطلعين تفسير الااحلام ترى ما يصير يقولون ان الحلم يتفسر حسب شنو تطلعين عنه ( كلها خزعبلات وسوالف هبل :P ).. ( كلمة تهقين تعلمتها من بوست سلّة ميوّه :D )

وأحلى شي سوالف الحريم الي يتزعولنون ههههه مالج منهن خليهن يطقن بروحهن .. يقولون العقل زينه ترى انا شخصيا مالي خلق اقعد اراضي بهذي واطبطب لهذيج يفكرن ما ورا الواحد شي غير سوالفهن الفارطه..

منووله إبقي حطي لافته على التيشيرت حقج وكتبي عليها " ماني زعلانه مع ابستتامه " عشان الكل يرضوون هاهاها

وانا بشوف كلكم كندكم خدامات في البيت .. ما ادري ليش عنا ما في من هالموضه ترى حنا نشتغل كلش بيدينا

اااه اخر شي بقلج سلمي على مستر "ص" شكله مطروق براسه ههههه

( عطيني رايج في الكويتي ترى انا بديت ااتقن اللهجه )

سلام ياالغاليه

Manal E. AlNuaimi يقول...

هاهاهاهاي نداء انتي عسل والله

الفقرة الاولى النجاح فيها 98% .. :)
ومعوره روسنا هذي ضابطتها عدل ..

الفقرة الثانية .. هاهاهاهاي بعطيج رسوب لاني ما فهمت منها شيء .. بس ماعليج بعلمج .. يوم يومين وخلاص انتي واللهجة ارباعه ..

بعد فقرة الحريم .. مضبوطة بس يتزعولنون .. هذي جديدة عدنا .. يتازعلون تقصدين :) .. :PPp

احط على التيشرت انا ماني زعلانة .. لا ماراح احط .. وخليهووون يطؤوووا ...

الفقرة الاخيرة ..98%

وانتي تقرين اللي نكتبه احفظي الكلمات وراح اترجمها لج للهجتنا .. شدي حيلج الموضوع فيه نجاح وروسوب ..


جد انبسطت بردج كالعادة طبعا .. ومنورة المدونة ..

سلة ميوّة يقول...

نداء

ضحكتيني...
اتهقين معناتها
اتظنين :)


منال مساج عسل وكوكييييز:***

نداء مصالحه يقول...

حبيبتي منوووله أأنا أرفض علامتج التقديريه للفقره الثانيه
ترى مو ذنبي انج ما فهمتين شقصدي :(

أنا بشرحلج اياها بالفلسطيني :

بقولو الحلم مش لاازم يتفسر ، عشان االتفسير يلي بتقريه للحلم غالبا هو يلي بيتحقق ، يعني تتحقق الاحلام حسب التفاسير ، مشان هيك مش لازم تفسري الاحلام :) .

يتزعولنون هذه كانت غلطه مطبعيه انا قصدت يتزعولون وبلهجتي " يِتْزَعْوَلِنْ " هاهاها .

سلّة ميوه تى نفسي اطقج ههههههه ما ادري ليش فهمت معنى تهقين " تدخلين " ههههههههههه والله انت يلي ضحكتيني

منووله بتعذر منج بس الانسه سلة ميوه موّهتني بمعاني الكلمات :D

والله اني بنبسط كثير كثير لما بقرأ البوستات تعونك انت وسلة ميوه
بحس فيهن شيء خاص

الله يديمك بصحه وعافيه حبيبتي :)

Manal E. AlNuaimi يقول...

سلة ميوّة - نداء ضحكتني سالفة اتهقين .... ما انتبهت لها قبل ...

سلة شكرا على هالترجمة السريعة لـ نداء ..

وصباحج سكر .. بس انا في الدوام الحين وما عندي كوكيييييييز .. :(
======

نداء يا جميلة .. درجاتج 100 من 100
ولا تزعلين ..
الحين الرد بيكون تصحيح اللغويات :)

ترى مو ذنبي انج ما فهمتين شقصدي :( 100%

أنا بشرحلج اياها بالفلسطيني : 100%

بقولو الحلم مش لاازم يتفسر ، عشان االتفسير يلي بتقريه للحلم غالبا هو يلي بيتحقق ، يعني تتحقق الاحلام حسب التفاسير ، مشان هيك مش لازم تفسري الاحلام :) . [الحين فهمت ..] ..:)

يتزعولنون هذه كانت غلطه مطبعيه انا قصدت يتزعولون وبلهجتي " يِتْزَعْوَلِنْ " هاهاها . [بنعديها هالمرة علشان الحلوين بس ]

سلّة ميوه تى نفسي اطقج ههههههه ما ادري ليش فهمت معنى تهقين " تدخلين " ههههههههههه والله انت يلي ضحكتيني

[هاهاهاهاهاهاها خليتوني ارجع اضحك نداء دخيلج لا تعيدييينها .. ترى صرت من اشوف كلمة اتهقين اضحك ..

منووله بتعذر منج بس الانسه سلة ميوه موّهتني بمعاني الكلمات :D .. [تقصدين موقهتني .. صح ]

سلة - نداء الله يجعل ايامكم ولحظاتكم في الدنيا كلها ضحك وناسة لانج صدق ضحكتوني ..

rainbow يقول...

منووول
أولاً سلامات عليك وعلى نظارتك و على عيونك الجميله ..إنتبهى ..هالموضوع بيتكرر معى كثير ..
وثانياً بطولة العمر يارب ..
.. أنا ملاحظ ماشاء الله إنك فعلاً بتحضرين دورات كثير ودائماً وزراء المالية بتكون بداياتهم كذى . ف ليه لأ ؟... يا رب اشوفك وزيرة قريب .
أما صديقتك ( م ) غيرى أسمها ( × ) وسوى لها delate
تحياااتى لك يا Miss BeautiFull

Manal E. AlNuaimi يقول...

الله يسلمك قوس قزح ..:) الله سلم بس ..

هي ليست بصديقة، هي فقط زميلة عمل .. ولكن عجبتني فكرة اني اغير اسمها من م الى X ..

ساقول لك موقف .. في العادة ارسل ايميلات للصديقات واختار bcc حتى لا تظهر عناوين الايميلات ، ومرة بالخطا لم اختر bcc فطهرت الايميلات والاسماء .. فجاءتني اليوم التالي ..
انتي ليش كاتبة اسمي في الايميل بس [ م ] والبقية بـ nickname .. وجابتها بطريقة انها مضايقة من هالشيء ..

شسوي فيها ...

beautiful mind يقول...

السلام عليكم
ازيك يا منال
لاول مرة انا هنا عندك في مدونتك
وبجد مدونة جميله بحق
لكي كل تحيه وتقدير
وان شاء الله يبقي بينا التواصل
احييك علي البوست اللي حكيتي فيه
حاجات كتير جدا عنك وعن شغلك
تقبلي مني كل تحيه

Manal E. AlNuaimi يقول...

beatiful mind
زيارتك الاولى كانت قريبة من اكمال مدونتي لعامها الاول ..

سعيدة بزيارتك هنا .. والاكثر برايك في ما قرأته فيها ..

ومساك خير ..