الصفحات

السبت، 27 فبراير 2010

Bye Bye February

Are you bored with life? Then throw yourself into some work you believe in with all your heart, live for it, die for it, and you will find happiness that you had thought could never be yours”
Dale Carnegie ]

،،
استمع إلى : Sarah Brightman - Love changes everything
أشرب : Coca-Cola light
آكل : Kinder
المزاج : كسل + خمول
،،
،،
غداً سيكون آخر يوم في شهر فبراير، وهالشهر ما كتبت إلا بوستين فقررت إني اكتب أي شيء صارلي أو صار في هذا الشهر بما أنه نحن في آخر يومنا فيه ..
،،
- أتابع وللمرة الثالثة مسلسل "زمن العار" واللي انعرض في شهر رمضان، وفاز بجائزة محمد بن راشد للدراما العربية الأولى. في رمضان وأنا أتابعه طلع مشهد مؤثر، والد بطلة المسلسل وإخوانها الشباب يضربونها، وصارت تبكي وأنا أبكي معاها :)، وتابعته على قناة قطر وانعاد نفس المشهد وانا أشاركها لدموع :)، والحين ينعرض في قناة MBC.
المشهد اللي بكاني .. http://www.youtube.com/watch?v=Hu81QDk_uBk
طبعا ما بتتأثرون إلا إذا كنتوا تابعتوا أحداث المسلسل .
تمثيل تيم حسن في المسلسل كان 100على 100.
،،
- انتهيت في هذا الشهر من قراءة كتاب لـ براك أوباما [أحلام من أبى "قصة عرق وإرث"]، ورواية أسمها "يوم غائم في البر الغربي" وبدأت بقراءة رواية جديدة حملت عنوان "السيدة من تل أبيب"، مش حابتنها للحين..
،،
- اشتريت [صحيح البخاري] ولم أبدأ في قراءته بعد. وسبب شرائي له هو أني كنت أبحث في Google وبالصدفة قرأت معلومة أعجبتني وكان المصدر هو [صحيح البخاري].
،،
- حضرت محاضرة في المركز الثقافي للممثلة المعتزلة "هناء ثروت" كانت رائعة جداً، وقد حملت عنوان "الأسباب العشر الجالبة لمحبة الله".
،،،
،- بعد أيام من المحاضرة الأولى حضرت محاضرة ثانية لـ "مشاري الخراز" مقدم برنامج "كيف تتلذذ بصلاتك" والذي كان يعرض في تلفزيون الرأي في رمضان الماضي، وقد حملت المحاضرة عنوان "كيف تتلذذ بالعبادات".
وفي موقع "ركاز" تجدون جميع حلقات البرنامج الذي عرض في رمضان .
أعطية ألف من 100..
،،
- أمضيت أيام في دبي "كتبت عنه في البوست السابق".
،،
- وأنا في دبي استلمت حقيبتي الجديدة "CHANEL Maxi Caviar" واشتريت ساعة "ROLEX" كلاسيكية وصارت ساعتي اليومية.
،،
- دخلت محل Fendi مع إني ما أحبه، وشفت حقيبة مختلفة عن ستايل فندي المعتاد، عجبتني بس ما تتوفر في المحل، يعني لازم أختار نوع الجلد واللون واستلمها بعد 3 أشهر .. الشيء المميز فيها إنها تنشال وهي مفتوحة وفي الجلد من الداخل قطعة ذهبية لكتابة الاسم عليها أو تاريخ الميلاد أو أي شيء خاص، أنا كتبت عليها اسمي ..
،،
- حدث بعض الأمور في العمل وهي التي جعلتني محبطة جداً هذه الأيام، وفي حالة خمول دائم ..
،،
- سجلت في الايروبيك واليوغا .
،،
- غيرت ديكور غرفتي [صبغ - أثاث وكل شيء] .. أحببتها الآن أكثر ..
،،
- من أسبوعين وأنا كل ويكند أمضيه على السرير مع أكواب النسكافيه وLabtop .. [كسل مش طبيعي].
،،
- الموقف اليل يتكرر معايه كل مرة لمما اروح أي صالون، نفس الكلام تقريباً باختلاف الأشخاص والجمل.
رحت الصالون بقص أطراف شعري + حمام زيت بالصبار،
سألتني اللي في الصالون: شعرك صاير جاف ..
أنا: من فترة ما عملت حمام زيت .. كسل
هي: أو يمكن من الصبغة.؟؟
أنا: لا أنا ما أصبغ ..!!!
هي: ولا بتعملي حنا..؟
أنا: لا ما أحب ..
هي : شعرك لونوا أسود طبيعي يعني ..
أنا: "ومن شر حاسد إذا حسد" طبعا فخاطري أقول هالشيء..
بس يعني لو كان شعري نفس لون شعر سميرة توفيق أو Kim Kardashian بقول ما ينلامون، لكن أحس لونه عادي بين الأسود والبني الدارك ..
،،
- بعدني ما خلصت عن الشعر .. هالموقف قلته للوتين :) دخلت مكتب الموظفات في القسم وكانت خصله امبينه من شعري
الموظفة: منال مبروك
أنا: على ....؟؟؟؟؟؟!!!
الموظفة: صابغة شعرج صح ..
أنا : لا ..
الموظفة: عيل صاير أسود بزيادة ..!!!!!!!!!!!!
،،
موقف ثاني معاها، بعد يومين ..
هي: انتي ليش ما تأخذين فيتامينات علشان يزيد وزنج..؟
أنا: مش محتاجة ..
هي: مش حلو الضعف عليج ..
أنا: أضحك وأقولها عاجبني ..
المصيبة إنها ذابحة عمرها بالريجيم من كذا شهر .. يعني تبي تضعف فكيف تقولي لازم تزيدين وزنج ..

أشكثرها الأشياء اللي صارت هالشهر لكني كسلانة أكتب أكثر .. :)

،،
- [سلة ميوه - الوتينريمALNoor وغيرهم بعد أكيد] ولكل كويتي وكويتية يمورن في مدونتي
"لا حشى ما مثلها بالكون صار يا عساها من عمارٍ في عمار..قولوا آمين
http://www.youtube.com/watch?v=lKu7ZhFD1mE&feature=related
،،،

،،
لك فقط : تصدق بمين [أليسا]

هناك 23 تعليقًا:

R-H-S يقول...

هو علشان هو 28 يوم بس عاوزه تخلصي منه؟؟ مبتيجوش الا علي الغلابه

بجد انا بقيت اضايق من نفسي لما بأبكي علي مشهد في فيلم او مسلسل بضايق اوي

هي بتحسد علشان شعرك اسود داكن ؟ هو العادي عندكو ايه بلوند؟

تبقى تعالي عندنا مصر هتلاقي السواد المعتبر

تحياتي

Manal E. AlNuaimi يقول...

صحيح والله يعني العادي عندنا اسود هي مستغربة ليه ....؟؟؟

أهو حسد والسلام والا غيره .. والله معرفش اسميها ايه ...

hahhahah مهو مبتجيش غير ع الغلابة صحيح .. ولانو 28 يوم عايزينه يخلص بسرعه ..

طيب شوف المشهد وحتعيط لبكره ..

غير معرف يقول...

آاااامين


منال يابعد عمري هالبووووست

ممممتع:)


اول شي مشكورة مشكورة مشكورة على طيب أصلج وذوقج وكلماتج الطيبه

وسمعت الاغنية :)


ولو انه هاليومين 24 ساعه حاطينها بس اهني كانت أحلى



وبعدين ضحكتيني على هذي اللي معاج بالشغل...

ماشالله صج قوية ملاحظة!!!!

تنتقد لون شعرج! يعني اهي ملاحظه لونه الأصلي!!
انا رفيجات عمري لما يكونون معاي وشويا مغيرين اللون او القصة ما الاحظ...
اما عن الرجيم فضحكتيني
جان قلتيلها يالله نزلي انتي جم كيلو جود انا ازيد :)( شريرة أنا )


وبالعاااافيه عليج المشتروات ومثل مايقولون اتقطعينهم بالعافيه

ونصيحة بالنسبة للكتاب اللي انتي مو حابته ( انا حاسه انج مثلي مستحيل توقفين كتاب بديتي حتى لو مستملقته وحارق اعصابج)
نصييييحه قطيييه واقري غيره :)



منال ..
هذا البوست خيالي...


رائع
..

ومليئ بالإنجازات


كوني بخير جميلتي

ربي يحفظج من العين ;)
حبي

Reem AlHajri يقول...

I <3 February ..
لا يخلص ؛( !

We can find the enjoyment every where , just feel it .. anyway we live for a reason , if we believe in it we can find all the entertainment =)

about me ..
أستمع الى : I will always love u - whitney houston
أشرب : Hot chocolate
آكل : شيء قد نصحتني به أختي ..
المزاج : صعب تحديده حقيقةً !

في فبراير كتبت الجزء الأخير من " حكايا بصوته " ، فقط .. مازلت عاجزة عن كتابة أي شيء آخر ..

" زمن العار " أتابعه أيضاً على الـ mbc فعلاً مسلسل جميل بس يعور القلب ! .. و الممثلين كلهم أدوا أدوارهم بحرفية تامة ماشاءالله ، ذكرتيني بأختي فهي أكثر إنسانة على وجه الكرة الأرضية تستمتع بتكرار مشاهدة مسلسلاتها المفضلة ، أحد المسلسلات تابعته 6 مرات تقريباً و لا تمانع من مشاهدته مره أخرى !

أنا أيضاً لا أحب Fendi ، و كثيراً ما أمنع أختي من شراء حقيبة من محلاتهم ، لول مادري ليش بس ما تدش مزاجي هالماركة !

لابد من وجود فترات خمول بين الفترة و الأخرى ، غير أن الفرق من شخص لـ آخر يكمن في مدى القدرة على السيطرة و التحكم بـ مدة هذا الشعور ، فـ دوامه لفترة طويلة يدعو للإكتئاب في كثير من الأحيان ، إسم الله عليج منه ، و لا تخلين شي يضايقج ؛*

أتعلمين رغم تكرار كلمة " كسل و خمول " في هذا البوست ، غير أنني أجده نشيطاً ممتعاً جداً .. إنخراطكِ في نشاطات عدة مختلفة أمر جميل جداً ، يدعو للتجديد و التغير ، غرفة جديدة .. صفوف يوغا .. و أشياء كثيرة أخرى .. إبتهجي يا فتاة لا شيء يدعو للخمول p; !

أذكار الصباح و المساء ، و المعوذات هي خير وقاية .. و جان تبين تقطينها بالويه أشكره .. ترى عادي ، اللي ما يستحي منج لا تستحين منه p; لول !

اللهم آمين يارب ؛*
حبيبتي والله فيج الخير ..

على فكرة ،
أسعدني البوست جداً ؛)

Manal E. AlNuaimi يقول...

مساج نور سلة

عاد أنا أمس أول مرة أسمع هالاغنية وووايد عجبتني ودورت عنها في youtube
ولقيتها ..

لا شكر ولا شيء هذا أقل شيء ..نشارككم افراحكم ولو من بعيد ..

اللي معاي بالشغل ماتلاقين منها اثنين .. اتدقق بكل شيء ..
بعدين ما تلاحظ وتسكت، لا لازم تعلق ..

ذابحتني طول الوقت تقولي كلي من هذا ومن هذا ومن هذا وانا اقولها ما احب تقولي شو يعني عن يزيد وزنج .. والله مع اني وزني تقريبا ثابت يعني مش محتاجة احرم نفسي من شيء لكنها معلقه على هالسالفة .. احيانا احس انا اللي استحي ارد.. بس عادي عندها ..

hahha عاد تدرين الشانيل سويت فيها نفس سالفة البوست اللي طاف .... hahahhaha
تسلمين حبيبتي ..

وعن الكتاب انا قريته وما حبيته بس شريته لانه كذا شخص مادح الرواية في الغلاف الاخير لها ..بس لازم عندي اخلصها .. وبعدين اشوف غيرها..

دايما دايما مرورج لج طعم .. وانا اكتبلج الحين وصوت قطرات المطر على نافذتي ..

ويحفظ يارب ويحفظ الجميع ..

Manal E. AlNuaimi يقول...

منورة ريم .. ومساج خير ..

عجبتني الجملة ..
We can find the enjoyment every where , just feel it .. anyway we live for a reason , if we believe in it we can find all the entertainment =)

على طاري "حكايا بصوته" وينج من بعدها ..
كانت قصة لو أقول عنها رائعة بيكون شوية في حقها ..

زمن العار طلّع لي روحي بمشاهده، قلت للوالدة شوفي شو بيصير الحين .. وانا كنت مجهزة الدمعة لاني شايفه المشهد كذا مرة، ردت عليه ترى كله تمثيل .. هو تمثيل صح بس انا بعدني للحين لما اشوف افلام عبدلحليم وسعاد حسني اتأثر .. [حساسة لا ضحكين] ..

انا مثل اختج اشوف حلقات اوبرا ودكتور فيل واشوف اعادتها اول ما ارجع من الدوام وكاني اشوفها اول مرة .. [اشهالعادة].

وياج فندي ما ينبلع بالمرة..
زين ريم ضغطي على كلمة FEndi وقولي لي رايج انا طلبت اللون الكحلي ومن الداخل بيج ... :)

انا لما كتبت البوست كنت صدق حاسة بكسل بس لما خلصت حسيت ان مزاجي اتغير :)

وتسلمين على هالمرور ..

حَافِـيَةُ الَقَدمَيّـنْ ولِبَاسِي المَطـرْ يقول...

بخري عمرج , في ناس والله عيونهم ماترحم .. ومشالله شكلج مزيونه
حطي بالج على نفسج


يا حلااااات الإغنيه اللي حاطتها
تعور قلبي لما اسمعها احس بالفرحه صج

bokeh of magic * يقول...

اوول زياره لي لمدونتج
واايد حبيت المدونة و بوستاتج وايد حلوووه =)
اول زياره و اكيد مو الاخيره ;)

Manal E. AlNuaimi يقول...

مساج خير حافية القدمين ..

ياكثرهم اللي عيونهم ما ترحم ..

أنا الاغنية بعد اول ما سمعتها في قناة الوطن عجبتني واااايد ...

[ ومشالله شكلج مزيونه ]
عجبتني هالجملة .. :):):) ونستيني فيها ..

=====
مساج خير .. *Being One

منورة بهالزيارة ..

وا ن شاء الله ما تكون زيارتج الاخيرة لمدونة .. :)

Reem AlHajri يقول...

منال
النور نورج حبيبتي ؛*
مساج خير و بركة يارب ..

ويني ؟ .. مادري تصدقين مضيعتني !
LOL حبيبتي والله تسلمين ، من ذوقج ..

LOOL اي نفس حركات الوالدة ، بس قولي أمي من إبوي .. لا أبجي جدامه جد يستلمني لول ! .. يا زينها والله الحساسة ؛* .. الله يخليلج الوالدة يارب و يحفظها ..

للأسف ما أشارككم ذات العادة ، بالعكس جداً ملولة و ما أحب أعيد و أكرر بنفس الشغله مليون مره .. لول والله تحفظني المشاهد ، يطلع المسلسل من عيني !

بالنسبة للجنطة ماشاءالله حلوة و عملية ، و السادة وايد أحلى من المشيرة هم الكحلي من ألواني المفضلة فـ عليج بالعافية إن شاء الله ؛*

الله يسلمج يارب ..
دايماً خلي المزاج رايء و إنبسطييي p; !

ماتريوشكا يقول...

أكثر شئ أحبه في فبراير... هو أجازتي السنوية^__^
مودي هالأيام alternative rock& roll ... أغاني الجاز و السوول...
أحب الماركات إلي مب منتشرة بين البنات:).. ما في بنت ما عندها شنطة لوي فيتون...أو غوتشي..أو ديور...أو فندي...و ألحين أشوف البنات هابين بشنط مارك جاكوب..! شنط فالينتينو.... تجنننن...أنوثة و رقة و فخااامة .... ^_^
very nice blog^_^
cheers^_^

Manal E. AlNuaimi يقول...

يا هلا ومرحبا ريم ..

صح شو المتعة في اني اشوف المسلسل او البرنامج كذا مرة ..
ماادري والله .. بس جد انمدج في المرة الثانية وكانها المرة الاولى اللي اشوفه ..

يعني برامج mbc4 كلها اتابعها مرتين والحين البرنامج المهم عندي hell's kitchen مع اني بعيدة جدا عن الطبخ لكن هالبرنامج ازعل لما يوصل لحلقاته الاخيرة ...

ويحفظ الجميع ..


قاعدة اسجل في موقع wordpress لانه بلوجر ماادري اشفيه علي .. كلما احط روابط او مقطع يوتيوب ادخل اشوف الصور مش موجودة ومكانها x فاظطر اني الغي الروابط ..
وفي البوست الاخير نفس الشي صارلي .. فلغيت كل الروابط تقريبا وخليت كذا واحد بس .. بس المشكلة بعدها ..

بحاول انقاها كلها بالبوستات الى ووردبرس اذا ضبطت معاي ..

بحاول اليوم والا باجر .. مع اني مااحب اجازف ..

ومساج خير ..

Manal E. AlNuaimi يقول...

واخيرا عرفت اسم هالدمية .. :) كانت عندي وحدة بس للاسف عدنا اطفال يحبون ياخذون كل شي يجذبهم .. فما حبيت اكسر بخاطرهم لما عجبتنهم عندي ..

الحين مافي ماركة مش منتشرة اذا ال hermes صارت عند الكل .. طبعا طبعا التقليد لانه مستحيل تكون اصلية وبنفس الفترة تكون عند الكل ...
وطبعا القالب غالب .. :) صح ..

اعتقد بعد انه الـ balenciaga الفترة اللي فاتت انتشرت بشكل كبير .. في الصيف خذت منها الاصفر بس كالعادة اتبهدلت شوي بسبب العباية ..

واحب المارك جاكوب بس فالنتيو للحين ما خذت عنهم ..
مكتفية بالشانيل الحين وماليه عيني :):):)

اشمعنى في شهر فبراير تكون اجازتج ..؟؟

ومساج خير ..

|:| DUBAI |:| يقول...

صباح المطر و الجو اللذيذ : )

الصراحة حبيت صفحتج

و تتهنين بكل يديد اشتريتيه

و متابعتنج

و سلام عليكم : )!

محمد عتلم يقول...

صباح الخير
انا قلت ازورك اليوم واقوللك صباح الخير منال

Manal E. AlNuaimi يقول...

مرحبا عزيزتي |:| DUBAI |:|

صدق صباح المطر والجو الجميل ..


انا كنت ازور مدونتج من قبل لا تكتبين موضوع انج راح تتركين التدوين ..

بس زين انج رديتي ..


تسلمين حبيبتي ..ونورتي المدونة ..

=====

مرحبا يا محمد

نورت المكان بالزيارة .. ومساك خير دايماً

الشاعر الفنان أحمد فتحى فؤاد يقول...

chanel maxi caviar ... و يوجا .. و إيروبيك .. و صبغ ؟؟؟
اللهم لا حسد .. شو ها الروقان؟
انا روحت غتفقت مع صالة جيم بس ألعب شوية أعمل ريجيم و مش لاقى دقيقة أروح
هاهاها
ما تخافى عينى بارده و مش بتحسد ...
بس بهزر معاج

صحيح بسألك لسه مش عارفة تدخلى على تعليقات مدونتى ؟
شو هذا ؟ حاولى بجد شوى

صباح الخييييير

Manal E. AlNuaimi يقول...

اهل أحمد

بلاش أر ياحمد ..

اسمه أر والا حسد ..:)

معليش حلبس العين الزرقاء بتاعتي ..

اليوغا مرتين بس في الاسبوع ..يعني مش كل يوم ..

وبعض الحاجات بديتها من شهر يناير وانتهيت منها في فبراير ..

واخير قدرت اكتب تعليق .. :)

وصباحك خير ..:)

أميـــــره يقول...

أستمتعت و أنا اقرأ مواقفك ..

اسلوبك جميل ..


يحفظك ربي من كل شر اُخيه .


:)

ماتريوشكا يقول...

خذت أجازتي لعدة أسباب... جسمي بيتمرد علي أن ما خذت اجازة! السنة إلي طافت ما خذت إلا اسبوعين.... و كنت غرقانة في الشغل... فألحين آخذ اجازتي و لا شي بيستويبي:)
السبب الثاني.... الجو يجنن! أحلي شي لما الواحد ياخذ اجازته و الجو يسمح بالتمشي الصبح على البحر.. أو الريوق في اب تاون مردف مع قراءة كتاب ... أو كشته للامارات الشمالية:)

هرميز طلعن منه شنط تقليد بعد:)!
مجتمع البنات إلي اعرفهم (من أهل و صديقات و زميلات عمل) ما ياخذون إلا الشنط الأصلية:) ... أنا قصدت أن التنويع حلو^_^

الدمية لها اكثر من تسمية^_^.. منها الماتريوشكا .. من اسمائها البوبشكا.. و شي ثاني بعد نسيته..
إلي كانت عندي بنات أختي كوشوا عليها... بالأحرى عطيتها بنت اختي لأنها كانت اتحبها واااايد.. ندمت اني عطيتها! لأنها أصلية و ما بتتحصل إلا في روسيا:(

Manal E. AlNuaimi يقول...

عزيزتي اميرة..

صباحج ورد ...

شكرا على رأيج في المدونة ...

ومدونتج اكيد أجمل ..

====

صباحج خير ماتريوشكا ..

ايوا يعني مرتبة اجازتج مع هالجو ..

في الدوام كنا نقول انه الجو بالمرة مش جو دوام ومكاتب . .. !! بس مجبورين ...:)

واليوم بعد الجو حلو .. :)

الشاعر الفنان أحمد فتحى فؤاد يقول...

منال
صباح الخير
تعالى شوفى البوست الجديد
و سمعينى رأيك
و خدى بالك أنا جاى دبى الأسبوع هذا .. يعنى هيجبك البوست هيعجبك
هاهاهاها
صباح الخييييير

Manal E. AlNuaimi يقول...

مساء الخير يا احمد ..

سواني وحكون في مدونتك .. وحتنور دبي .. :)